فيلمون وهبي 1917 – 1986

تحضير جوزف أبي ضاهر

ولد في كفرشيما.
درس في كلية الشويفات، والموسيقى على يد سليم الحلو.
1937 غنى أول موال بغدادي في اذاعة حيفا.
1938 قدم أول سكتش بالأشتراك مع فيروز، وعنوانه: زيت وزيتون.
شارك في مهرجانات عدة، وأعمال مسرحية وسينمائية (ملحنا وممثلا).
وألحانه كانت سببا في شهرة عدد غير قليل من المغنين.
أحد الكبار الذين أوجدوا أغنية لبنانية مميزة.

دفـــاتر الذكريات - برنامج تلفزيوني - الفنان فيلمون وهبي (وهبه)
كتابة: جوزف أبي ضاهر

فيلمون وهبه فنان ارتبط اسمو بعدد كبير من الأغاني الشعبيه الناجحه وكانت الحانو وراء شهرة مجموعه من المغنين والمغنيات اضافه الى المهرجانات الفولكلوريه والمسرح والسينما اللبنانية.
أسلوبو خاص أدهش كبار الفنانين العرب وأجمعو على اعتبارو أحد ركائز الأغنية اللبنانية اللي عرفت معو انتشار واسع، ونكهه مميزة.

ولد فيلمون وهبه بكفرشيما القريبه من الشويفات سنة 1918. بيّو المختار سعيد وهبه وامّو مريم أيوب غابت وكان عمرو بعد ما تجاوز التسع سنين.

سنواتو الدراسيه الاولى كانت بمدرسة الشويفات، وبالعكس عن رفاقو كان يميل للموسيقى والغنا بهالمرحله اكتر من ميلو للّعب، وكانت أكتر الأغاني اللي يرددا بملعب المدرسه: أنا انطونيو ويا جارة الوادي.

ما طوّل فيلمون وهبه بالمدرسه تركا واشتغل طرّاش مع ابن عمّو بمنطقة المناره. وبالسهرات كان يغنّي، وكان خيّو أسعد يعزف ع العود.

سنة 1937، ولمّن صار عمرو 19 سنه شَعَر بالموهبه إنّها بلّشت تضج فيه، قرر يعمل أي شي. وبحديث صحافي بيقول عن هالمرحله: «يوما قرّرت سافر الى القدس، قطعت جبال ووديان، تعذّبت، ولكن وصلت للاذاعه. وبعدني بذكر شكل الغرفه اللي استقبلوني فيا وكان موجود فريد الأطرش ومحمد عبد الكريم.

وبذكر إنّو فريد الأطرش سألني عن بلدي وليش قصدت إذاعة القدس؟ قلتلّو أنا من لبنان وما عنّا اذاعه بعد، وبدّي غنّي موّال بغدادي، ولكن لمّا عرفت إنّو اللي عم يسألني هو الفنان فريد الأطرش غنّيت قدّامو «يا ريتني طير لطير حواليك».

بالمرحله الاولى من وجودو بفلسطين اشتغل فيلمون وهبه مطرب باذاعة القدس. غنّى المواويل البغداديه ومجموعه من أغاني محمد عبد الوهاب وكان معجب بصوتو وبألحانو. أما أوّل أغنيه لحّنها فكانت بعنوان «حمّلتني فوق الألم» من كلمات محمد علي فتّوح وغناء حنان، وكانت بسنة 1941.

... أما الانطلاقه الأوسع فكانت بإذاعة الشرق الأدنى مع نجاح سلام وأغنيات «برهوم حاكيني» «ع نار قلبي ناطره المكتوب» «يا قلبي» «شب الأسمر جنّني». لمّن سمعهن الفنان محمد عبد الوهاب ارسل برقيه هنّى فيا فيلمون وهبه وقلّو بالبرقيه: «انت فنّان أصيل وطريق النجاح مفتوح قدّامك».

لمّن رجع فيلمون وهبه من القدس تعلّم العزف على العود وبعض أصول الموسيقى وأصول النوته على يد سليم الحلو وميشال خياط. وبحديث صحافي بيقول فيلمون وهبه: «الحلو وخياط شجّعوني، تعلّمت منن بعض رموز النوته، ولكن «الدو ري مي» خلقتلي وجع براسي وخلّتني اتخلى عن التعليم واعتمدت على موهبتي. ولمّن قبلتني الاذاعه كملحن خلقت ضجه الها أوّل وما الها آخر».
بمطلع الاربعينات تعرّف فيلمون وهبه على الاخوين رحباني وكان سبقن الى اذاعة الشام، فبعت معو مدير الاذاعه احمد عسّي يطلبن الى الشام لدخول الاذاعه وكانت أغانين بلّشت تنعرف وأوّل 3 أغاني تسجّلوا كانوا «يا قطعة من كبدي ـ نحنا والقمر جيران اللي غنّتا فيروز وحنان ـ والأغنيّه التالته عتاب».
سنة 1945 قدّم فيلمون وهبه للاذاعه اللبنانيه أوّل اسكتش بالاشتراك مع فيروز وكان عنوانو «زيت وزيتون».

مع بداية الخمسينات اشترك فيلمون وهبه والأخوين رحباني بتقديم اسكتشات اذاعيه مع نصري شمس الدين، عفيف رضوان، سعاد هاشم وغيرن وتميّزت هالأعمال بالطرافه وبالالحان الجميله والمناخ الشعري اللبناني. وانعرف فيلمون بهالأعمال باسم «سبع».

ب 28 آب سنة 1959 ولمدة اربعة أيام تقدّم المهرجان الشعبي الفنّي ببعلبك وكان فيلمون وهبه أحد اعلامو الى جانب وديع الصافي، توفيق الباشا، ذكي ناصيف، الاخوين رحباني ومحمد محسن.
شارك فيلمون وهبه بالالحان والتمثيل بمهرجانات كتيره منذكر منا: موسم العز، جسر القمر، فخر الدين، جبال الصوّان، قصيدة حب وغيرا. اضافه الى الأعمال المسرحيه الرحبانيه متل الشخص، المحطه، يعيش يعيش، لولو، بترا.

حضورو بهالأعمال كان أكتر من حضور مميّز، كان الوهج اللي تتحدّث عنّو الصحافه بعد ما تنتهي الأعمال وتعيش الاذاعات عليه. وبحديث اذاعي للفنان محمد عبد الوهاب بيقول عن الحان فيلمون وهبه بالمهرجانات: «هالالحان نابعه من حياة الناس ولأنّها حقيقيه بتستقبلا الحياة بفرح وبتلبسها مشلح الاستمراريه».

أما فيلمون وهبه فكان يقول عن تعاونو مع صوت فيروز كان تعاون مثالي من خلالها سافرت الحانو الى كل العالم: لندن، باريس، البرازيل،مصر، ومعظم البلدان العربيه.
وبيذكر إنّو من اجمل الالحان اللي عطاها لفيروز: يا كرم العلالي، جايبلي سلام، يا مرسال المراسيل، يا داره دوري فينا، من عز النّوم، يا قوني شعبيه، ورقو الأصفر، اسوارة العروس وغيرن. أما الأحب الى قلبو فكانت أغنيت «أنا خوفي من عتم الليل».

مع فيروز والأخوين رحباني شارك فيلمون وهبه ب 3 أفلام من خلال الحانو وتمثيلو الظريف اللافت. الأفلام هنّي: بياع الخواتم سنة 1965، سفر برلك 1966، وبنت الحارس سنة 1968.
سنة 1954 كانت اول المشوار بين فيلمون وصباح، لحّنلا «ما بيسايل شب واستحلا» و«دخل عيونك حاكينا».

هالنوع من الاغاني استقبلتو الاذاعه اللبنانيه ببعض الحذر ولكن لهفة النّاس لهالاغاني وتزايد طلبن عليا خصوصي ببرنامج "ما يطلبه المستمعون" خلا الحذر يسقط وتتصدر أغاني فيلمون وصباح معظم الفترات.

ما توقفت عند هالمرحله أعمالو لصباح، كانت صباح من اكتر المطربات اللي غنّولوا ألحانو بنكهه خاصه ودلع قريب من القلب حسب تعبيرو.

من هالأغنيات منذكر: ع العصفوريه، الباصره، مرحبتين، عبده عبيد عبيدو، جوزي ما بيلفي ع البيت، واقفه ع راس الطلعه، جنينة حبيبي وغيرا...

باكتر من حديث صحافي كان فيلمون وهبه يقول إنّو الحانو لصباح بتولد بسرعه وعفويه، ربما لأنّو الكلام اللي بتغنيه فيه بساطه وعفويه، وربّما لأنّو شكلا وصوتا بيوحو بأنغام الفرح.

شارك فيلمون وهبه صباح بالتمثيل ب 3 اعمال هنّي: ست الكل، حلوه كتير، ودواليب الهوا.

لحّن فيلمون وهبه لوديع الصافي أغنيات كتيره، وكان معجب بصوتو ويعتبرو «معجزة الغناء العربي» أو الصوت البعد ما خلق متلو.

لحّن لسميرة توفيق أجمال أغانيها وعطي نصري شمس الدّين الحصه الكبيره. تعاون معو من خلال الأعمال الرحبانيه، وتعاون معو باعمال خاصه.

من اعمال فيلمون وهبه لنصري شمس الدين منذكر: ابني وبنتي، الطف من النسمات، بحلّفك يا طير بالفرقه، بكّير بعدك يا زغيره، هدّوني هدّوني، دبكة ع العين، محسوبك درويش، على عالي الدار، عم تغزل وغيرا.

ما توقّف فيلمون وهبه بأعمالو عند هالأسماء فكانت الحانو موزّعا بين مطربين تعاونوا معو من خلال الاذاعه اللبنانيه، ومطربين من خارج الاذاعه اللبنانيه، منذكر: ميشال بريدي، ملحم بركات، سهام شمّاس، حسن عبد النبي، محمد سلمان، عصام رجّي، لمعان، جوزف عازار، وداد، سعاد هاشم، رنده...وغيرن.

اضافه الى المطربين اللبنانيين لحّن فيلمون وهبه مجموعه من الأغاني باللهجه المصريه لمطربات مصريات وكانت لألحانو الفضل بشهرتن من هالغنيات منذكر: لشريفه فاضل «حبيبي نجار»، و«يا مهندس هندسلي بيتي» لشاديه غنّتها بفيلم «لمسة حنان»، ولكن اغنية شريفه فاضل كانت الاولى لسنوات ببورصة الأغنيات.

التنوّع بالحان فيلمون وهبه وتعدد الأصوات اللي تعاملت معو رافقن تعدد بأسماء الشعراء اللي كتبولوا احلا الكلام.

منذكر من هالشعراء: اسعد السبعلي، اسعد سابا، مارون نصر، توفيق بركات، عبد الجليل وهبه، توفيق العطّار، ميشال طعمه، الأخوين رحباني، مارون كرم، نزار الحر، جوزف حرب، طلال حيدر، اميل ملكون، شفيق المغربي وغيرن.

بدايات فيلمون وهبه كانت بالغناء ثم التلحين فالتمثيل فكتابة الأغنيه الساخره الانتقاديه وتقديما بأسلوب خاص.

الموسيقي العالمي ختشادوريان سمع مقطع من فيلمون وهبه وقال عنّو: فيلمون بيقدر يتصرّف بصوتو متل ما بيتصرّف العازف البارع بآلتو. صوتو مميّز بالحكي وبالتمثيل، بيأثّر بالمستمع لدرجه بتجعلو يقبل منّو أي شي خصوصي عندما كان فيلمون يرتجل الشعر ويقول مرّات كلام أي كلام بيناسب القافيه، وهالاسلوب من المميزات اللي أعجبت النّاس وأضحكتن.

5 تشرين التاني سنة 1985 توقفت الضحكه، تسكّرت الستاره، الأغنيّه بعد ما اكتملت، المسرحيّه بعد ما خلصت ولكن البطل غاب.... غاب بعد أشهر من المرض والمقاومه الصحيّه.
67 سنه شكّلت نهج جديد وخاص بالفن اللبناني، قريب من الشعب وقريب من الفولكلور، وطالع من روح الشرق.

نال فيلمون وهبه بحياتو أكتر من وسام وتقدير، منذكر وسام من مصر سنة 1963، وأوسمه من الجيش اللبناني بسنوات 63، 65، 66، وسام الأرز من رتبة فارس سنة 1970، جائزة سعيد عقل سنة 1975، وسام ضابط اكبر سنة 1985 وأطلق مجلس بلدية كفرشيما اسمو على شارع رئيسي بالبلده.

بعد مرور 3 سنوات على غياب فيلمون وهبه وتخليداً لذكراه دخلت فيروز الى الاستوديو لتسجيل 3 الحان خصّا فين فيلمون وهبه وما تنفّذوا بحضورو: بليل وشتي، أسامينا، ولمّا عالباب يا حبيبي منتودّع.

الالحان التلاته كتب كلماتن الشاعر جوزف حرب..
ولأنّو كل بدايه في الا آخر.
ولأنّو كل حكايه في الا نهايه.
ولأنّو كل ولاده في الا غياب...
... تسكّر الكتاب ع ذكريات حلوه بعدو صداها عم يضج بالبال.
فيلمون وهبه فنان في الذاكره.